ചില കമ്പനികൾ 'സ്റ്റോർ ലൂട്ടിങ്ങ് ' എന്ന പേരിൽ ചില കലാപരിപാടികൾ നടത്തുന്നത് ഒരുപക്ഷേ നിങ്ങളുടെ ശ്രദ്ധയിൽപ്പെട്ടിട്ടുണ്ടാകും. അവർ കസ്റ്റമേഴ്സിനായി നടത്തുന്ന മത്സരത്തിൽ വിജയികൾക്കുള്ള പ്രൈസാണ് ഈ ഇടപാട്. സംഗതി മറ്റൊന്നുമല്ല, കമ്പനിയുടെ സ്റ്റോരിനുള്ളിൽ കടന്ന് നിശ്ചിത സമയത്തിനുള്ളിൽ അവർക്കിഷ്ടപ്പെട്ട സാധനങ്ങളുമെടുത്ത് പുറത്ത് കടക്കണം. എടുക്കുന്നതെല്ലാം അവർക്ക് സ്വന്തം. കൊള്ളാം എത്ര മനോഹരമായ ആചാരം അല്ലേ ? ഇനി പിറ്റേദിവസം കമ്പനിയുടെ സ്റ്റോർ കൊള്ളയടിച്ചെന്നും പറഞ്ഞ് പോലീസ് നിങ്ങളെ അറസ്റ്റ് ചെയ്താലോ...? നിങ്ങളുടെ പ്രതികരണം എങ്ങിനെയായിരിക്കും?
പോട്ടെ മറ്റൊരു ഉദാഹരണം പറയാം. ശ്രദ്ധിച്ച് കേൾക്കണം.
നമ്മൾ കാശുകൊടുത്ത് ഒരു ഡിറ്റി എച്ച് വാങ്ങി വീട്ടിൽവെക്കുന്നു. അതിൽ 250 ചാനലുകൾ ഉണ്ട്. മാസാമാസം വാടക കൊടുക്കുന്നതുകൊണ്ടും, ടിവിയുടെ റിമോട്ട് നമ്മുടെ കയ്യിൽ ഇരിക്കുന്നതുകൊണ്ടും നമുക്ക് ഇഷ്ടമുള്ള ചാനൽ കാണാൻ അവകാശമുണ്ട്. അതും ഏതു സമയത്തും എന്തു പരിപാടിയും നമുക്ക് കാണാം. അങ്ങിനെയിരിക്കേ ഒരു ദിവസം ഒരു ടി വി ചാനൽ അതിൽ ഒരു അശ്ലീല പരിപാടി (സിനിമ തന്നെ ആയ്ക്കോട്ടെ ) സംപ്രേക്ഷണം ചെയ്തു. ഭാഗ്യത്തിനോ നിർഭാഗ്യത്തിനോ നിങ്ങളത് കാണുകയും ചെയ്തു .അടുത്ത ദിവസം ആ പരിപാടി കണ്ടകുറ്റത്തിന് പോലീസ് നിങ്ങളെ അറസ്റ്റ് ചെയ്‌താൽ നിങ്ങളുടെ പ്രതികരണം എങ്ങിനെയായിരിക്കും ? സത്യത്തിൽ നിങ്ങൾ കുറ്റവാളിയാണോ?
'അതെ' എന്നാണ് ഉത്തരമെങ്കിൽ നിങ്ങളിത് തുടർന്ന് വായിക്കേണ്ടതില്ല. മറിച്ചാണെങ്കിൽ ഒരു സംശയം ചോദിച്ചോട്ടെ;
നമ്മുടെ വീട്ടിലെ / മൊബൈലിലെ ഇന്റർനെറ്റ് കണക്ഷൻ നമുക്ക് വെറുതെ കിട്ടുന്നതല്ലല്ലോ. അതുപയോഗിക്കാൻ നാം നമ്മുടെ സർവ്വീസ് പ്രൊവൈഡർക്ക് കാശെണ്ണിക്കൊടുക്കുന്നുണ്ട്. അതും അവർ അപ്പപ്പോൾ പറയുന്ന കഴുത്തറപ്പൻ തുക. അങ്ങിനെയുള്ള നമ്മൾക്ക് അതിൽ ലഭിക്കുന്ന ഏത് വെബ്സൈറ്റും ഉപയോഗിക്കാനുള്ള അവകാശവും സ്വാഭാവികമായും ഉണ്ട്. നമുക്ക് ഉപയോഗിക്കാൻ നൽകിയിരിക്കുന്ന ഡാറ്റവെച്ച് നമ്മൾ ഏതെങ്കിലും വെബ്സൈറ്റിൽ കയറി ഒരു സിനിമ ഡൗണ്‍ ലോഡ് ചെയ്തു. നിർഭാഗ്യത്തിന് അതൊരു പൈരേറ്റഡ് കോപ്പിയായിരുന്നു. അത്യാധുനിക സാങ്കേതിക വിദ്യ ഉപയോഗിച്ച് പോലീസ് നമ്മൾ സിനിമ ഡൗണ്‍ലോഡ് ചെയ്ത വിവരം കണ്ടെത്തി അറസ്റ്റ് ചെയ്തു. സത്യത്തിൽ നമ്മൾ കുറ്റവാളിയാണോ? ഇന്റർനെറ്റിൽ ലഭ്യമായ വീഡിയോസിൽ പ്രത്യേകിച്ച് സിനിമകളിൽ പൈരേറ്റഡ് ഏതാണ് പൈരേറ്റഡ് അല്ലാത്തത് ഏതാണ് എന്ന് തിരിച്ചറിയാൻ മാനദണ്ഡങ്ങളൊന്നുമില്ലല്ലോ. ഒരു സിനിമയുടെ പൈരേറ്റഡ് കോപ്പി തങ്ങളുടെ വെബ്സൈറ്റിൽ അപ്ലോഡ് ചെയ്യപ്പെട്ടാൽ അത് കണ്ടെത്തി നീക്കം ചെയാൻ ആ വെബ്സൈറ്റിന്റെ അധികാരികൾക്ക് ഉത്തരവാദിത്തമില്ലേ? ഇനി അവരത് ചെയ്യുന്നില്ല എന്നിരിക്കട്ടെ; ആ നിയമവിരുദ്ധ പ്രവൃത്തിചെയ്യുന്ന വെബ്സൈറ്റ് തങ്ങളുടെ ലക്ഷക്കണക്കായ ഉപഭോക്താക്കൾക്ക് നല്കാതിരിക്കാൻ ഓരോ സർവ്വീസ് പ്രൊവൈഡറും ശ്രദ്ധിക്കേണ്ടതല്ലേ. ഇതൊന്നും ചെയ്യാനോ ചെയ്യിക്കാനോ കഴിയാത്തവിധം ദുർബ്ബലമാണോ നമ്മുടെ നാട്ടിലെ സൈബർ നിയമങ്ങൾ ? സത്യത്തിൽ വഞ്ചിക്കപ്പെടുന്നത് ഉപഭോക്താക്കളല്ലേ ?
സ്ഥിരമായി പൈരേറ്റഡ് സിനിമകൾ അപ്ലോഡ് ചെയ്തുകൊണ്ടിരിക്കുന്ന വെബ്സൈറ്റുകൾ കണ്ടെത്തി നിരോധിക്കാതെ പൈറസിക്ക് ഒരു അന്ത്യമുണ്ടാവുമെന്ന് തോന്നുന്നില്ല. നിയമവിരുദ്ധ പ്രവൃത്തികൾ ചെയ്യുന്നവരും, അതുകൊണ്ട് നേട്ടമുണ്ടാക്കുന്നവരും കാണാമറയത്തിരിക്കുമ്പോൾ/ അസ്പർശരായിരിക്കുമ്പോൾ നമ്മുടെ ജയിലുകൾ ഡൗണ്‍ലോഡെന്ന കൊടും ക്രൂരത ചെയ്തവരെക്കൊണ്ട് നിറയട്ടെ....
വാൽക്കഷ്ണം : ഇനി പൈറസിയെ ഇല്ലായ്മ ചെയ്യാൻ വേണ്ടി ടൊരൻറെങ്ങാൻ നിരോധിച്ചാൽ; മലയാളസിനിമാ വ്യവസായം തന്നെ നശിക്കും. നമ്മുടെ നാട്ടിലെ മിക്കവാറും സിനിമാ സിംഹങ്ങളുടെയും തൂലികയുടെ ഇന്ധനം എന്ന് പറയുന്നത് തന്നെ വിദേശ സിനിമാ ടൊരന്റുകളാണ്. ഇതൊരുമാതിരി കൈതമുള്ളേൽ പിടിച്ച അവസ്ഥയായല്ലോ. നിരോധിക്കാനും വയ്യ നിരോധിക്കാതിരിക്കാനും വയ്യ !
#premampairacy
No comments:
Post a Comment